陳法齊師傅接受東方日報訪問 2022-02-04

 政Whats噏:議員虎年八字算命運程預測 田北辰宜戒急、狄志遠難勝任

玄學家陳法齊。
 
 
在完善的選舉制度下,新一屆立法會已經喺上個月展開,適逢新年新氣象,東網邀請玄學家陳法齊為幾位議員以四柱八字預測壬寅虎年嘅運程。陳師傅話資深議員當中,田北辰同葉劉淑儀同屬急性子嘅人,但前者今年要慎言,後者工作上會較為奔波;唯一嘅非建制議員狄志遠,儘管得償所願重返議會,但亦會慢慢發現,現實同理想有衝突。至於新丁議員陳仲尼因窮於應付繁重嘅文件工作,出席率有可能會偏低。 
 
 
 
 
陳師傅話今次為幾位議員作出運程預測,純粹基於命理觀點,不涉政治立場。佢話議員田北辰屬於急性子,往往喜怒形於色,比較難同其他人合作,所以其運程都相對反覆,而今年就怕且會因一時忘形而失言,令到名聲受損,而正月或者7月身體有機會出毛病,睇嚟田認真要留意下喇!
 
另一位性格比較急嘅議員,陳師傅就話係葉劉淑儀。但陳師傅話葉劉並非如外表般硬朗,即使佢能夠承受壓力,但有得揀嘅話,佢都會寧願舒舒服服囉。陳師傅指葉劉今年工作上可能會奔波少少,但算係人緣幾好嘅一年,仲有機會掌握實權添。
 
今屆立法會除咗連任嘅議員,亦有兩位舊人重返議會,其中作為唯一嘅非建制派,社福界議員狄志遠。陳師傅指狄將會難勝任其職位,事關狄會慢慢咁發現,現實同理想有衝突,所以唔會好敢講嘢,自然都唔會有好大作為。陳師傅又指,狄嘅主張同主流意見不同,就算係同自己黨友,有時都難以搵到共識,話狄擔任議員其實唔係好自在。陳師傅又提醒狄要小心精神壓力所導致嘅疾病。
 
至於另一位重返議會嘅議員鄧家彪,陳師傅指虎年係鄧顯露名聲嘅一年,但只不過係虛名,而並非實際獲利。陳師傅形容鄧係一個重理念嘅人,較為自我、固執、堅持,所以政策上未必會願意同商界妥協。另外,陳師傅又提到,鄧今年嘅失眠問題會比較嚴重,希望鄧可以保重身體喎。
 
上月初有份參加「洪門宴」而搞出「大頭佛」嘅新丁議員,當中陳仲尼就被陳師傅批算出,佢唔太介意其他人點睇自己,而只在意搵食,今年理論上都會平安度過嘅。陳師傅又形容陳仲尼腦筋轉數快,容易掌握商機,但係作為議員,即使有助理幫忙,繁重嘅文件工作都可能令陳仲尼應接不暇、未能享受議員一職,所以來年嘅出席率都可能會偏低喎。
 
至於另一位新丁議員陸瀚民,陳師傅形容佢做人算係靈活,加上陸來年39歲時會迎來財運。陳師傅話,陸喺虎年開始會有少許名聲,但並非實權,同老婆會多咗爭執,感情上可能會有啲變動喎。但撇除上述呢幾個情況,陸喺虎年都會平淡度過嘅,可能要到2023年先會因某啲議題而令佢揚名啊。
資料來源:https://hk.on.cc/hk/bkn/cnt/news/20220203/bkn-20220203182014794-0203_00822_001.html