陳法齊師傅接受東方日報訪問 2022-02-05

政Whats噏:預測官員虎年仕途 新一屆政府鄭若驊無得留低(陳法齊師傅四柱八字算命算流年運程)

新年伊始,萬象更新。再過多幾個月,香港特區政府就要換屆,而現屆政府問責團隊當中嘅諸位部門首長,其仕途能否得以延續,乃大眾關注嘅焦點。玄學家陳法齊應東網之邀,為幾位政府高官預測壬寅虎年嘅運程,其中律政司司長鄭若驊、食物及衞生局局長陳肇始、勞工及福利局局長羅致光,佢哋三人嘅人生軌迹將會有啲變動,可能退出官場咁話。
 
首先係自上任以嚟醜聞纏身、被嘲為「避政司司長」嘅鄭若驊。陳師傅相信佢無得留低,事關鄭若驊做官嘅運氣其實早於2020年已經去到尾聲,係好彩先可以做到依家。陳師傅指出,鄭若驊天生係一個競爭者,好多嘢都鍾意同人爭,自然會招惹到好多小人是非返嚟,所以咪咁多醜聞囉!陳師傅又指,鄭若驊喺虎年不但同官運無緣,亦都有可能會同老公有更多爭執,影響感情添啊!
 
至於喺防疫抗疫上表現進退失據嘅食衞局局長陳肇始,陳師傅指佢嘅命格唔夠強勢、果斷,缺乏領導才能,所以推出嘅政策、措施都受到千夫所指,儘管如此,陳師傅話陳肇始有機會到2023年先至落台。其實陳肇始比較適合獨立處理自己有興趣嘅事務,所以退休後好大機會重返學院,主要做返學術同教學嘅工作喎。
 
勞福局局長羅致光,雖然一直以嚟有指佢嘅智商高達160,但陳師傅認為未來政府換屆後,佢留低做局長就難啲喇,因為難以發揮才華喎,可能要轉去做行政管理嘅工作咁囉!陳師傅解釋,羅致光嘅命格屬於陽火,好鍾意用自己嘅思想影響其他人,即係會比較自我中心,要大家圍住佢轉、遷就佢咁啊。加上羅諗嘅嘢往往只係得自己明白,其他人唔容易理解,但羅又會自我感覺良好喎,所以羅份人先至會咁離地囉!而正因為羅天性思考同一般人迥異,所以佢過去多數擔任智囊嘅角色。不過,羅致光68歲後思考會變慢,轉數無咁快,能力比以往遜色,未必再擔任到智囊型嘅重要崗位。睇返資料,羅今年正值68歲。
 
陳師傅強調,有關上述三人官運仕途嘅預測,只基於佢哋嘅四柱八字,當中不涉政治考量。到底三人頭頂烏紗能否得保,答案過幾個月就會揭曉。
 

陳肇始好大機會重返學院。

羅致光68歲後思考會變慢,能力比以往遜色。

玄學家陳法齊。
 

資料來源:https://hk.on.cc/hk/bkn/cnt/news/20220204/bkn-20220204120840354-0204_00822_001.html