陳法齊師傅接受東方日報訪問 2022-02-08

政Whats噏:玄學家料梁天琦或離港 周庭2028年再有入獄風險(陳法齊師傅四柱八字算命算流年運程)

上月最令政界關注嘅事件,可以話係前「本土民主前線」發言人梁天琦終於刑滿出獄,佢喺2016年大年初一晚捲入旺角暴動案被捕,及後喺2018年6月被判監6年,外界預料佢日後將轉趨低調。至於前香港眾志成員周庭因2019年參與及煽惑包圍灣仔警察總部嘅未經批准集結,前年被判監10個月並喺舊年中出獄後亦少出現喺公眾眼前。東網早前就邀請咗玄學家陳法齊,預測包括兩人在內嘅虎年運程,預料梁天琦未來或會離開香港,周庭就可能喺2028年或2029年再有入獄風險添啊!
 
陳師傅話30歲嘅梁天琦仍有號召力,之不過就「好隱藏、屬暗拱」,係一啲不為人知嘅力量,原則上到49歲前都仲有好大嘅影響力。至於會否再活躍於政壇呢?佢就話梁或要等到2029年左右,先會再敢就政治議題發表多一啲政治睇法。佢亦提到梁今年嘅工作運麻麻,更會惹小人事非,而2026年亦要小心健康。梁喺內地出世,及後隨母親移居香港定居,陳師傅就話梁人生最少經歷兩次大型移民,料梁未來再有機會離開香港。
 
至於周庭,陳師傅就話現時25歲嘅周八字屬水泛木漂,喺39歲之前都係「面個浸好睇唔好用,底個浸有苦自己知」,雖然名聲依舊,或會繼續獲得國際榮譽,但強調呢啲名譽只係虛名、無意思,仲話愈獲獎愈出事。
 
咁周庭今年工作會有咩發展?陳師傅預料佢今年生活相對算穩定,佢會獲熟人介紹工作,工作性質似乎同文書方面有關。至於2028年係咪真係有風險再次入獄呢?陳師傅就話一切取決於佢喺依家嘅局勢,係咪仲選擇做自己想做嘅事喇!
 
講到周庭嘅戰友、前香港眾志秘書長黃之鋒涉及3宗案件正服刑,佢亦因前年參與民主派「35+」初選,涉違《港區國安法》,案件仍待審理。陳師傅就話,相信黃仲要坐多一段時間,如錯過咗2023年保釋外出機會,就要等2028年先可以出返嚟,更指黃若要重返政壇,睇怕都要等到49歲或以後喇!健康方面,佢就話黃精神壓力大,腸胃會較差,今年近視亦會加深喎。
 
至於2014年違法佔領行動(佔中)發起人之一戴耀廷,佢同樣因35+初選案而被控串謀顛覆國家政權罪,依家至去年初還押至今。陳師傅話戴嘅政治能量已大跌,加上今年「官殺重」會被睇得好緊,所以經常處於高壓情況,精神壓力會好大。佢又話,即使戴有機會獲准保釋,亦需要謹言慎行啊。之不過,陳師傅話上述預測都只係單純命理分析,並唔涉及政治立場。睇嚟實際情況會係點呢,都視乎佢哋嘅造化喇!
 

周庭被預測2028年再有入獄風險。

黃之鋒健康好似麻麻,被預測精神壓力大、腸胃會較差。

戴耀廷因初選案正被還押。